Արթնացող հրաբուխների կախարդական աշխարհ, ժայռերի եզրին բազմած ամրոցներ, կարկաչող ջրվեժներ. այսպիսի չքնաղ տեսարանների ականատես կարող է դառնալ յուրաքանչյուր ճանապարհորդ: Անհրաժեշտ է միայն այցելել իրական գեղեցկությամբ հիացնող կախարդական վայրեր:

Այս մասին գրում է Huffington Post-ը և ներկայացնում երկրի տարբեր անկյուններում ծվարած 15 սքանչելի վայր, որտեղ իսկապես հնարավոր է վայելել այդ գեղեցկությունն ու զգալ բնության հզորությունը:

1. Տաճարների լողափը, Իսպանիա

«Տաճարների լողափ» (Playa de las Catedrales) կոչվող այս վայրը գտնվում է Իսպանիայի Գալիսիա համայնքում: Ոչ ուժեղ մակընթացության ժամանակ հնարավոր է բացահայտել ոլորուն թունելների և ժայռային տաճար-քարանձավների գեղեցկությունը:

2. Շոտլանդիայի լեռնային բարձունքները

Եթե Եվրոպան վայրի բնական սահման ունենար, ապա դա, անկասկած, Շոտլանդիան կլիներ: Կանաճ լեռների երկիրը, մառախլապատ լճերը և բարձրադիր վայրերում տեղակայված ամրոցները պատկերում են տեղի կոլորիտն ու բնության առանձնահատուկ գեղեցկությունը:

3. Namib-Naukluft ազգային պարկը, Նամիբիա

Նամիբիայի ազգային պարկերից մեկը` Namib-Naukluft-ը, «սողացող» բնական այգի է, որը ներառում է խորդուբորդ լեռներն ու աշխարհի հնագույն Նամիբիա անապատը` 65 մլն տարվա պատմություն ունեցող գունավոր ավազաթմբերով:

4. «Դարապաս դեպի դժոխք», Եթովպիա

Եթովպիայի կենտրոնական մասում գտնվում է Erta Ale կոչվող խոշոր բաց գոգավորությունը, որն իրենից առկայծող լավայի լիճ է ներկայացնում: Այն հայտնի է «Դարապաս դեպի դժոխք» անվանումով:

5. Այծքաղների կղզի, ԱՄՆ

ԱՄՆ-ի Յուտա նահանգում գտնվող Այծքաղների կղզին, որն իրենից մեծ աղի լիճ է (Great Salt Lake) ներկայացնում, Արևմտյան Ամերիկայի ամենատեսարժան վայրերից մեկն է: Լճի ավազանի սյուրռեալիստական գուներին գումարվում է ազգային պարկի տարածքում բնակվող վայրի գոմեշների, այծքաղների և դաշտագայլերի ներկայությունը, ինչն ստիպում է վայրի բնության գրկում հայտնվել:

6. Սալար դե Ույունի, Բոլիվիա

Բոլիվիայի «Սալար դե Ույունի» կոչվող չորացած աղի լիճն իրենից ներկայացնում է աշխարհի ամենամեծ բնական «հայելին», որի վրա կանգնելիս մարդիկ տեսնում են իրենց արտացոլանքը:

7. Յալթա, Ուկրաինա

Ղրիմի ափերին գտնվող (Յալթա քաղաք) Գասպրա քաղաքատիպ ավանը տեսարաններ է հիշեցնում «Գահերի խաղը» (Game of Thrones) հայտնի հեռուստասերիալից: Առափնյա տարածքը հայտնի է իր լողափերով ու հանգստավայերով, իսկ Սև ծովի ափամերձ ժայռերի վրա ծվարած ամրոցներն իսկապես հեքիաթային տեսարաններ են հիշեցնում:

8. Սոլ դե Մանյանա, Բոլիվիա

Բոլիվիայում գտնվող «Սոլ դե Մանյանա» (Sol de Mañana) երկրաջերմային տարածքը, որի անվանումն իսպաներենից թարգմանաբար նշանակում է «առավոըյան արև», տեղակայված է 4572 մետր բարձրության վրա: Այն իրենից տաք ջրերի կամ գեյզերատիպ հանքավայր է ներկայացնում, որից կանաչադեղնավուն ծծմբային աղբյուրներ են ծագում:

9. Մեծ Կանյոն, ԱՄՆ

Հյուսիսային Ամերիկայի ամենատեսարժան վայրերից մեկը` «Մեծ Կանյոն» կիրճը (Grand Canyon), Երկիր մոլորակի վրա տեղակայված բնության հուշարձաններից մեկն է:

10. Իջեն, Ինդոնեզիա

Ինդոնեզիայի Իջեն հրաբուխն իր տեսքով հիացնում է շատերին, ովքեր քայլարշավ են կազմակերպում` տեսնելու հրաբխի 1.5 կմ խորությամբ տեղակայված փիրուզագույն խառնարանը:

11. Իսլանդիայի սառցադաշտերը

Հրաբուխներ, ջրվեժներ, սառցադաշտեր, վիկինգներ… այս բառերը լավագույնս են բնութագրում Իսլանդիան, որը հավասարապես հայտնի է և´ սառցադաշտերով, և´ ջերմային լողավազաններով:

12. Breithorn, Շվեյցարիա

Breithorn անվանումը կրող լեռը, որը գերմաներենից թարգմանաբար նշանակում է «մեծ սար», Ալպերի ամենաբարձր լեռնագագաթը չէ, սակայն ամենագեղեցիկն է: Հեշտ հաղթահարելի ճանապարհներն այն ավելի հանրահայտ են դարձնում լեռնագնացների շրջանում: Breithorn-ին հատուկ գեղեցկություն են հաղորդում բազում սառցադաշտերը, որոնք գետերի պես ցած են սահում լեռնագագաթից:

13. «Բրանսֆիլդ», Անտարկտիդա

Անտարկտիդան լի է Երկիր մոլորակի ամենատեսարժան բնապատկերներով: «Բրանսֆիլդ» (Bransfield) նեղուցի մաս կազմող այս կամարատիպ սառցաբեկորը դրանցից մեկն է: Այն նեղ ջրային ուղի է` լի ամենատարբեր ձև ունեցող սառցաբեկորներով:

14. Գեիրանգեր ֆյորդ, Նորվեգիա

Նորվեգիայում ամենագեղեցիկ տեսարանների կարելի է հանդիպել հենց հայտնի ֆյորդերում: Երկրի ամենաուշագրավ զբոսաշրջային վայրերից մեկը Գեիրանգեր ֆյորդն է, որը ներառված է ՅՈՒՆԵՍԿՕ-ի Համաշխարհային ժառանգության ցանկում: Այն հայտնի է ջրվեժներով և ժայռերով:

15. Los Glaciares, Արգենտինա

Արգենտինայի Los Glaciares ազգային պարկը առավել հայտնի է «Պերիտո Մորենո» (Perito Moreno Glacier) սառցադաշտով, որն իրենից 250 քառ. կմ մակերես զբաղեցնող հսկա սառցաշերտ է ներկայացնում: